Leise schleichn mir dorchn Wald.
Wie e Kirch aus Fichten, grie on donkel
„Wenn mr leise blabbt, Kend, senge de Veechele!“
Dei halber Fenger is erhuubn, ich mach halt.
„Hoch, e Kiebitz! Un e Maas! Kieeeebitz! Kieeebitz!“
Guck, do liecht e Quarz im Gras. „Schätze!“
„Do, und do, sei Preisselbeer! Isse ner.“
„Guck, do is e Vuuchelbeer! Mach e Astl ronter,
Itze schnadtst es onten ahh, hernooch muss die Rend ahh ronter,
Du musst kloppen, mitn Griff, naa, bissl wadder uuhm.“
„Opa, ich krich nuch blaue Fleck!“
„Kend, des gherrt drzu! Horch, wie schie des Pfeifl klengt. Zieh immer auf und zu!“
Nebn dr Eckbänk in dr Kich
Liecht es grosse lange Messer.
Ner dr Opa kaa die Scheibn
Esu glatt un regelmässign schneidn.
„Mechst nuch en Beeschnitz?“ –
„Haaa!“ ho ich gsoocht, ner demit iech sah, wies geht.
Heit mach iech des ahh esu,
Schneid de Scheible iebern Daume ro.
Zwote, mei Haamet, wie bie iech dir gut…“
Des Lied, des ons verbonden hot, in unnrer Muttersprooch,
Wie oft saß iech am Schieferberch, guck aufn Heerrnberch roo,
En Buckel glehnt an die alte Lerch.
E Hacht kreischt vo uhm roo. Der wohnt ahh uubm am Mittelberch.
Un jedes Moll beim Fahrn nooch Pirk
Hor dr Günther, Anton ons beglatt
Un mir – besonders die Elfriede – ham alle lautstark im Auto gsonge.
Du host gepfiffen in dr Sonne,
Wenn mir zen Segeln gange sei.
Dort aufm Wasser warst du frei,
De Noos im Wend, es Ruder in der Hend,
Onter ons sei die Fischle vorbeigezuugn.
Un Wolken am Himmel druum.
Kesselgoulasch gabs anne Ohmd, un Kirschen, sauerrot.
Die Oma hott raffiniert gebacken. On du soochst eechal ner: „No, guuut!“
Mehr Lob, des host du nie verstanden. Des war ah net vonnöten.
Weils ehrlich war. Su warst du halt. E leiser Mensch, zefrieden.
„No, haaa!“ – wie oft ho iech des ghert. Un war emmer verstanden.
Wenn aaner miech geerchert hot, dann host du neebn mir gstanden,
An meiner Schaukel, und host gsoocht: „Die Welt wär schie.“
Mehr musst mr gor net soogn. Dei stille, ruiche Art hat miech
Mei Kendheit lang getroogn.
Weegn deine Fenger hoo iech nie gepopelt. Weil se sonst oobrechen. Des host du oft un oft gezeicht.
Un wie mei Kend war ahh suweit, do hot se guckt.
Du host mit kaaner Wemper gzuckt. Damals wie heit.
Zeletzt, an den Tooch, woost gange bist,
Do lagst im Bett, host gsoocht, als wär iech widder klaa: „Mei Karin. – Leg dich eweng drzu.“
Wie damals, als iech sieme war.
Un plötzlich wars en Sonntich frieh, un iech ruck ze mein Opa hie,
Die Oma schnarcht un mir heern Rucksack Radio.
Uum iebern Aschberg geht die Sonn auf, du ziehst mich nah drzu,
Un zeichst mir klaane Wolken. „Guck, e Hoos.“
Un iech liech in dein Arm un denk mir bloß:
„Des Hoosnbuch, des muss er mir mol widder lesen.“
Heit guck iechs ahh, mit meiner Klann, un sieh, dass des auf Tschechisch is.
Iech koa kaa Tschechisch. Der Opa ahh net.
Aber fiergleesen… hott er´s mir gewiss. (Des wass ich genau!)
Mei Kendheit is rem. Mei Flieder vorm Haus is alt.
Heit bie iechs ahh. Un leb e annersch Lebn.
Un doch guck mich jeden Frieh dr Opa ah:
Komm, mir genne naus nein Wald. Und ich wass, do find ich diech.
Unter dr Leerng, in de Schwarzbeer, in de Schwamme bist zestrich.
Iech nemm dei Messer mit, und seit kurzem ahh dein Hut.
Iech zeich meim Kend, wos e Sammetkopp is, e Galln-, un e Staapilz.
Knollen- und Perlpilz erkenn ich sicher.
Ich wass, wos die Lerich sengt, un wann werds widder Gwitter.
Ich riechs, wenns schneit. Un wie mr Schneeschuh fährt.
Wie mr e Iglu baut, un wie mer pfeift.
Dei alter Schlieetn is itze meiner Tochter ihr Gefährt,
Wos dr Opa baut, des ieberdauert die Zeit.
Un deshalb… kaa ich dich geh lossen.
Die Trauer is leise, wie du.
Wall do alte Gschichtn drenne sei, klaa, ruich, leise.
Die ghern zu mir drzu.
Mit de Oma back ich, mool un näh iech.
Mit dir geh iech nein Wald. Mit dir schnitz iech un segel.
„Machs gutt, Opa!“ „Machs gutt. Komm widder.“ „Bis bald.“
Krallentanz's Blog 